العقاب من اكثر الاستراتيجيات الشائعة المستخدمة فى تعديل السلوك ، ولكن العقاب له ضوابط لابد من أخذها فى عين الاعتبار ليكون العقاب عديم الضرر النفسى الطفل ( الحالة ) .
فاكر زمان أيام ابتدائى لما كنا بنغلط مع مدرس الفصل كان بيجيب العصاية و يلويها كتير علشان تكون طرية و يقولك متنشفش ايدك عشان متوجعكش جامد . ازاى دة ! مع ان المدرس بيعاقبك فعاوز يوجعك ! تعالوا نتكلم عن ضوابط العقاب
ضوابط العقاب :
1- العقاب يتبع السلوك الغير سوى مباشرة ، علشان عقل الطفل يربط بين السلوك الغير سوى و العقاب . يعنى مينفعش الطفل يعمل حاجة غلط النهاردة فاضحك و اعدى الموضوع ، و بكرة اعاقبه .
2- لازم العقاب يكون موجه بهدف تعديل السلوك ، يعنى انا كأخصائى أو أم أو أب أعاقب الطفل علشان عمل سلوك غلط مش عشان اطلع الغل و الزهق بتاعى فى الطفل .
3- لو استخدمت العقاب الجسدى لازم تبعد عن مناطق الكرامة ، يعنى متضربش على الوش و تحت الحزام و القفا.
4- قبل ما تعاقب يكون الطفل فاهم انه عمل حاجة غلط و بالتالى بيتعاقب عليها ، و بعد العقاب تفهمه ايه السلوك البديل للسلوك الغير سوى .
5- ياااريت ماتضربش الطفل بسبب و منغير سبب ( العقاب دايما موجه علشان لا يفقد فاعليته ) .
6- نوع فى أساليب العقاب بتاعتك ، مش لازم كل ما الولد يغلط تضربه . عشان الواد كدة هيكرهك و كمان الضرب الكتير ممكن يخليه طفل عدوانى .
طيب هل فيه أنواع للعقاب ؟
اها طبعا ولكن بعيدا عن العقاب الجسدى و المعنوى و المادى تعالو نتكلم عن نوعين رئيسيين :
1- العقاب الموجب :
و هنا بقدم حاجة للطفل ينفر منها ، مثلا تكشر فى وشه أو الضرب أو توقف الطفل فى النوتى كرونار .
2- العقاب السالب :
و هنا بحرم الطفل من حاجة بيحبها ، مثلا مش هتاخد مصروفك عشان عملت كذا .
و أخيرا ، كل طفل وليه طبيعته و انفعالاته يعنى لازم تنتقى الاستراتيجية اللى هتعدل بيها السلوك ، مش كل الاطفال بينفع معاها العقاب و العكس صحيح فيه أطفال مش بينفع معاها غير العقاب ، و لكن بنصح بإننا نخلى العقاب آخر استراتيجية نستخدمها .
و لمعرفة استراتيجيات أخرى لتعديل السلوك ، اضغط هنا ثمانية جيجا تعديل سلوك
لمعرفة كيف يتم التعزيز بطريقة صحيحة و فعالة لتعديل السلوك ، اضغط هنا استراتيجية التعزيز
لمعرفة كيف لا يتحول المعزز لرشوة ، اضغط هنا كيف لا يتحول المعزز لرشوة
كتب هذا المقال / حسن أبوطالب
أخصائى التخاطب و التربية الخاصة
صفحة الفيسبوك الخاصة بكاتب المقال
تعليقات: 0
إرسال تعليق