ثمانية جيجا تعديل سلوك
هى سلسلة ارشادية لمؤلفها أ/ حسن صبحى أبوطالب أخصائى التخاطب و التربية الخاصة ، و هى تهتم بتثقيف و توعية و ارشاد الأمهات بالطرق والاستراتيجيات المختلفة لتعديل سلوك أولادهم ، و سنقوم بعرض هذة السلسلة بالكامل خلال هذا المقال
ميجا رقم ( 1 )
□ يعنى أيه سلوك إنسانى ؟
♧ السلوك عبارة عن
أى فعل أو نشاط يصدر عن الإنسان ، سواء كان النشاط ظاهر أو غير ظاهر .
يعنى الكلام سلوك ، و اللعب سلوك ، و الأكل
سلوك ، و الكذب سلوك ، و السرقة سلوك ، و الصدق سلوك ، و الخجل سلوك وهكذا ...
ميجا رقم ( 2 )
□ هل السلوك الإنسانى ممكن يتغير ؟
♧ طبعا ممكن سلوك
الفرد يتغير ، و دة لسبب بسيط جدا و هو '' التكيف مع الوسط و المجتمع المحيط ''
طيب تعالوا نضرب مثال :
دلوقتى لو طفل وقع الكباية على الأرض غصب
عنه فاتكسرت ، الولد جرى من مكان الكباية المكسورة ،
ماما جت من الشغل متعصبه و بتسأل مين اللى كسر الكباية ، الطفل '' كذب '' عشان خايف ماما تضربه .
( الطفل دة غالبا بيكون صادق و مش بيكذب
،ولكن لما حس ان ماما ممكن تضربه '' اتغير سلوكه '' )
♧ و طبعا السلوك ممكن
يتغير من سلوك سوى لسلوك غير سوى ، أو العكس ..
ميجا رقم ( 3 )
♤ الحقنااااااى يا حسن ...
¤ إيه قلقتنى عليك ، قول اللى
عندك !
♤ الحكاية كلها إنى
لما تابعت '' 8 جيجا تعديل سلوك '' من اول 2 ميجا فى السلسلة ، قررت أراقب سلوكيات
أولادى
¤ وبعدين لقيت إيه !!
♧ لقيت العجب من سلوكيات
لأولادى و منتشرة عند الأطفال و المراهقين ، و عاوز أعرف منك ...
إيه السلوكيات اللى اتدخل و اعدلها من خلال
استراتيجيات تعديل السلوك👌
( من ضمن محتوى السلسلة ) ؟؟؟
¤ علشان أجاوبك على السؤال دة :
عاوزين الأول نعرف ان كل نشاط ممكن نعمله
ليه اتجاهين✌
⬅ اتجاة موجب ( السلوك السوى )
⬅ اتجاة سالب ( السلوك المضطرب الخاطئ )
و طبعا بحتاج أعدل السلوكيات المضطربة
(الخاطئة)
طيب مثال على الاتجاه السالب و الموجب للسلوك
:
👈
نفس المثال بتاع الكباية ، دلوقتى الطفل وقع الكباية على الأرض و
اتكسرت ، و ماما كانت متعصبة جدا و سألته
؛ مين كسرها ؟
الطفل هنا هيعمل '' نشاط لغوى '' او سلوك
لغوى ،
ليه اتجاهين ✌
1 _ الاتجاه الاول : الطفل هيقول لماما
انه هو اللى وقعها و اتأسفلها و مش هيعمل كدة تانى ( سلوك الصدق '' سلوك سوى '' )
2 _ الاتجاه الثانى : الطفل هيكذب على ماما
و يقولها مش أنا اللى وقعت الكباية ( سلوك الكذب '' سلوك مضطرب '' )
انا هنا عاوز اعدل سلوك مضطرب ( الكذب
)
☆ ولكن مش أى سلوك
مضطرب أتدخل معاه بشكل فورى و اعدله ، فى تريكات و حاجات كتير جدا لازم نعرفها عشان نتدخل و نعدل السلوك ، هنتعرف على التريكات كلها فى الميجات القادمة ...
ميجا رقم ( 4 )
□ انتباااااه عشان هيغفلووووك .
♧ يااااعم ارحمنى
بقا
□ قولت فى ميجا ( 3 ) ان الاتجاه السالب
للسلوك بيكون غير سوى . صح كدة ؟
♧ أها صح ، بس هات
من الآخر عاوز توصل لأيه ...
□ طيب عندى سؤال لولبى ، هل كل السلوكيات السالبة محتاجة تعديل سلوك ؟
♧ لا طبعا ، لأن مش
كل سلوك سالب هيكون سلوك غير سوى
♧ هبسطهالك ، دلوقتى يا جماعة لازم يتوافر شوية شروط كدة عشان اقدر اقول ان السلوك
غير سوى و عاوز تعديل سلوك 👌
نضرب مثال و بعدين نقول الشروط :
لو طفل فى حضانة ( اكبر من 4 سنوات ) عنده
سلوك مص الأصابع ، كلنا هنكون متفقين ان دة سلوك غير سوى ، و بالتالى
هنحتاج نعدل السلوك ..
أما بقا لو طفل عمره أقل من ( 3 سنوات )
و عنده سلوك مص الأصابع ، فأحب اقولك ان السلوك دة طبيعى جدا ..
لان الطفل فى السن دة بيتعرف على كل شئ
حواليه عن طريق لسانه حتى ايده هتلاقيه حاططها فى بوقه فى أغلب الأوقات ..
¤ يعنى مش كل الأوقات سلوك مص الأصابع بيحتاج
تعديل سلوك ...
الشروط بقا :
1- ان يكون السلوك غير مناسب مع عمر الحالة
.
2- ان يكون السلوك متكرر لمدة ( 3 شهور
) و التكرار على مستوى الزمان و المكان .
يعنى بيتكرر فى مواعيد مختلفة و مواقف مختلفة و فى اى مكان مش مكان محدد .
□ يعنى هستنى على السلوك الغلط لمدة 3 شهور
منغير تدخل ؟؟
♤ لا طبعا ، بنستخدم
معاهم أساليب معينة ( لكل سلوك أسلوب معين ) علشان نحد من تقدم السلوك الغير سوى .( مجرد إرشاد أسرى )
أما وضع الخطة لتعديل السلوك و التركيز
على تعديل السلوك و الطفل يروح لأخصائى وكدة ، مش بنستخدمه الا بعد ما نتأكد ان السلوك
دة متكرر .
و بكدة نقدر نقول ؛
》 أول هدف من أهداف
تعديل السلوك : إزالة السلوك المضطرب
الغير سوى و استبداله بسلوك سوى .
ميجا رقم ( 5 )
¤ هقولك على سر ، و متقولش
لحد ..
♤ قوووول
هحكيلك قصة الأول
بص يا سيدى ، كان ياما كان ، كان فيه ولد
اسمه حمادة ،
حمادة ابن عمه ربنا وفقه و هيتجوز ،
و دلوقتى يوم الفرح و قاعة بقا و حكايات . المهم ان حمادة سلم على ابن عمه وقاله '' ربنا يجعلها آخر الأحزان ( البقاء لله ) ''
طبعا دة سلوك لفظى غير سوى ...
طيب لو حمادة فى عزاء و سلم على الناس و
قالهم '' البقاء لله ''
طبعا دة سلوك لفظى سوى ...
♧ هو دة بالظبط اللى
انا عاوز أقوله ...
ان قد يكون السلوك مناسب فى موقف معين ،
و غير مناسب فى موقف آخر✌ .
و بكدة نقدر نقول ؛
》ثانى هدف من أهداف
تعديل السلوك : ضبط السلوك للتوافق
و التكيف مع الموقف .
ميجا رقم ( 6 )
♡ مش عارف أجيبهالكم
إزاى
♧ طيب إحنا فى شهر
رمضان
لو قولتلك بقا . رمضان كريم رمضان كريم
رمضان كريم رمضان كريم رمضان كريم رمضان كريم رمضان كريم رمضان كريم رمضان كريم رمضان
كريم رمضان كريم رمضان كريم رمضان كريم رمضان كريم
♧ هتضايق ، صح ؟؟
اللى أنا عاوز أقوله ان فيه ناس عندها سلوكيات
حلوة ، ولكن حجم السلوك كبير بشكل أوفر ( بيتكرر بشكل أوفر )
و العكس فيه ناس عندها سلوكيات حلوة ، ولكن
حجم السلوك صغير بشكل أوفر .
و بكدة نقدر نقول ؛
》ثالث هدف من أهداف
تعديل السلوك : ضبط حجم السلوك
أو تكرار السلوك ( أخليه معتدل ) .
_ يعنى أزوده لو كان حجمه قليل .
_ يعنى أنقصه لو كان حجمه كبير .
ميجا رقم ( 7 )
الحكاية فى كلمتين ، بابا نايم و الطفل
شايف ماما و هيا بتاخد فلوس من جيب بنطلون بابا ، و تلتفت الأم للطفل و تقوله
'' متقولش لبابا ''
الطفل هنا اكتسب سلوك السرقة من ماما
...
تف على عمو يا حبيبى
فالواد كل ما يشوف عمو يتف عليه ، غرقت
عمو يا حبيبى
هدفى من الرغى دة ، إن الطفل بيكتسب السلوك
الغير سوى فى الغالب ، عن طريق مشاهدته أو سماع السلوك على حسب نوع السلوك فعلى أم
لفظى ( شاف حد بيعمل السلوك قدامه ، سمع حد بيقول السلوك اللفظى )
يعنى خلى بالك من كلامك و أفعالك قدام أولادك
و مش بس كدة ، الطفل بيتعمد إنه يكرر السلوك
الغير سوى لما الطفل يلاقى تعزيز على السلوك دة .
يعنى لما ابنك الصغير مثلا يضرب حد فى الشارع
متشجعوش و تعززه ، عشان ممكن يكتسب العدوانية .
ميجا رقم ( 8 )
تبقى قاعد في أمان الله تلاقي حد عمل سلوك
يعصبك جدًا ومع ذلك صاحبك اللي قاعد جمبك هادي وشايف إن السلوك عادي وميستاهلش عصبية !
لو حد عنده سلوك السرقة وهو عايش في بيت
كل حرامية أكيد هيكون السرقة عندهم سلوك سوي وطبيعي
أنا عاوز أوصلك إن فيه حاجة بتحكمنا في
تعديل السلوك أو بمعنى أصح فلسفة تعديل السلوك ..
إيه هي الفلسفة دي؟!
توافق الفرد مع نفسه ، و تكيف الفرد مع بيئته ومجتمعه .
يعني هتلاقي كل أهداف تعديل السلوك بتصب
داخل بوتقة التوافق و التكيف . كلامي ده بقى عاوزك تستفيد منه بشكل عكسي
في اتجاهين :
الأول : نغير البيئة لو كانت سبب في السلوك غير
السوي
بمعنى إن الطفل اللي عنده سلوك سرقة مش
هعرف أعدل سلوكه لو كان أسرته و اصحابه كلهم حرامية
فهنا احنا بنعدل سلوك الوسط البشري المحيط
بالطفل (ارشاد أسري) قبل ما بنعدل سلوك الطفل
التاني : فيه سلوكيات غير قابلة للتغير أو الطفل
نفسه بيكون غير مرن تمامًا لتعديل سلوكه ، فهنا لو السلوك ممكن التغاضي عنه
(سلوك مضطرب غير ضار ) ، بنأهل الوسط المحيط
بالطفل عشان الوسط يتكيف معاه ويتقبل السلوك ده عند الطفل (ارشاد أسري)، وكمان بنأهل
الطفل نفسيًا إنه يتقبل السلوك ده فيه ...
ميجا رقم ( 9 )
♤ إيه الحيرة دى بقا !!
♧ امتى اتجاهل السلوك
الغير سوى الصادر من ابنى ، و امتى اتدخل و أقوله كدة عيب و اقوم سلوكه ، و امتى أروح
بابنى لأخصائى ؟؟؟
☆ مبدئيا عاوز اتكلم
معاكم عن مراحل بيمر بيها الطفل ( الحالة ) بعد اكتساب السلوك ...
1- المرحلة الأولى :
هنا الطفل عمل السلوك الغير سوى لأول عدة
مرة ، يعنى مرحلة بداية ظهور السلوك الغير سوى ...
📌
هنا مينفعش أوضح للطفل ( الحالة ) أن السلوك الغير سوى جذب انتباهى
، يعنى من الآخر '' اعمل نفسك ميت ''
متتعصبش عليه و تضربه ، متقولوش كدة عيب
، متبرقلوش 👀
. ودى بنسميها استراتيجية '' التجاهل ''
بنعمل كدة لسبب بسيط جدا ، لان الطفل قد
يكون عمل السلوك صدفه يعنى السلوك مش مقصود أصلا ، أو لان الطفل عاوز يجذب انتباهنا
ليه ... فلو حس ان السلوك الغير سوى جذب انتباهنا هيكرره كتير ...
♧ طيب نسيب الطفل
لحد ما يخلص السلوك الغير سوى و ينفذه !!
📌
لا طبعا ، هنا بنستخدم حاجة اسمها استراتيجية '' الإلهاء '' ، يعنى الطفل بيعمل السلوك
دلوقتى ، بنبرة صوتى العادية و بتعبيرات وجه عادية ، أقوله يناولنى حاجة من المطبخ
مثلا ( أى حاجة تشغله عن فعل السلوك الغير سوى )
و ممكن بعد ما الموقف يخلص بوقت مناسب
( بعده بيوم مثلا ) أحكى للطفل قصة كبيرة جدا ، و ضمن الشخصيات داخل القصة ولد وحش
كان بيعمل السلوك الغير سوى .《 مع كامل التورية
》
2 - المرحلة الثانية :
هنا الطفل كرر السلوك الغير سوى كتير ،
فأصبح السلوك الغير سوى عادة عند الطفل .
هنا بقا الأمر يتوقف على الطفل :
أ ) لو كان طفل من ذوى الإحتياجات الخاصة
.
نتوجه بيه للأخصائى ...
ب ) لو كان الطفل سوى .
يبقى نطبق معاه الاستراتيجيات فى البيت
و ان شاء الله السلوك هيتم إطفاؤه .
و يستحسن نستشير أخصائى أو حد بيفهم فى
تعديل السلوك . ( دور الأخصائى هنا الارشاد الأسرى )
3 - المرحلة الثالثة :
هنا بقا الطفل عمل السلوك الغير سوى و بقا
السلوك عادة ، و اتكرر كتير جدا جدا لدرجة ان الناس بدأت تنفر من الطفل ( الحالة )
، و السلوك الغير سوى أثر على ثقة الطفل بنفسه و وصل الطفل لعدم التواصل مع الناس و
الإنعزال .
هنا بقا بننصح للتوجه لأخصائى شاااطر جدا
...
ميجا رقم ( 10 )
♧ هو أى حد دخل المطبخ
يبقى طباااخ ؟!
°•° عاوز تقول إيه !!
☆ عاوز أقول مش أى
طفل أو مراهق ضرب واحد صاحبه يبقى عدوانى ، علشان ممكن يكون متنمر ، أو ممكن يكون عنيف
، أو ممكن يكون الطفل سوى معندوش عدوانية أو تنمر أو عنف .
¤ لتوضيح أكتر ؛ نفرق بين العدوانى و المتنمر
و العنيف ...
《١》العدوانية : و دة من اسمها ، بيكون عنده عداء أو خلاف مع الفرد اللى بيمارس
عليه العدوانية ، يعنى أى حد على خلاف معاه هتلاقيه بيمارس العدوانية ضده .
《2》التنمر : دة عبارة عن عدوان و عنف ولكن ضد فئة معينة من الناس '' الفئة
كلها بدون استثناء حد ''
مثال :
☆ إسرائيل بتمارس
التنمر ضد أى حد من الفلسطينيين .
☆ الأفراد ذو البشرة
البيضاء بيمارسوا التنمر ضد أى فرد ذو بشرة سوداء .
☆ القوى بيتنمر على
أى حد ضعيف .
《٣》العنف : دة بقا بتلاقيه عنيف فى كل ردود أفعاله ضد معظم الأشخاص اللى
بيتعامل معاهم ، حتى كلامه بيكون عنيف ( تهكمى )
□ ملحوظة :
الفروق دى بستخدمها بشكل شخصى ، علشان أقدر
استخدم استراتيجيات تعديل السلوك بشكل أكثر دقة ، مثال :
استراتيجية المد بالمعلومات ...
1- فى حالة العدوانية :
المد بالمعلومات هيكون ان الاختلاف فى الرأى
لا يفسد للود قضية . و ان الاختلاف فى الرأى ظاهرة صحية و السبب كذا و المفروض نتعامل
مع الخلاف فى الرأى بالشكل كذا ..... الى آخره
2- فى حالة التنمر :
المد بالمعلومات هنا هيكون ان الفئة التانية
زينا بالظبط ، ولكن كل فئة وليها الخصائص اللى بتميزهم و ليهم عيوبهم و مميزاتهم ،
وهكذا ...
3- فى حالة العنف :
المد بالمعلومات بيكون على هيئة قواعد للتعامل
و فنون الرد بإختلاف انواعها و هكذا ...
ميجا رقم (11)
مين هنا بيتفرج على أرطغرل؟!
تعالى هقولك إيه علاقة أرطغرل بالعدوانية
والعنف والتنمر، الميجا دي بتاعتك
اتفقنا في الميجات اللي فاتت، إن الطفل
بيكتسب السلوك عن طريق مشاهدته أو سماعه على حسب نوع السلوك (لفظي، فعلي) وبالتالى
هنكون متفقين ان أى فيلم أو مسلسل أو حتى كارتون الطفل بيشوفه احتمال يأثر فى سلوك
الطفل (اللي هو الحالة)
بالتالى مسلسل زي أرطغرل مليان قتل و عنف
و ضرب ممكن يخلى الطفل عدوانى أو متنمر أو عنيف
▫ انت بتقول إيه ؟! ده تمثيل وبعدين دي حروب
للدفاع عن الدين، واحنا في الحروب بنكون على حق مش اعتداء على الآخر..
▪ كلام جميل جدًا، هتكلم معاكم دلوقتي عن
مجموعة مسببات لعدوانية أو تنمر أو عنف الطفل ''مسببات ناتجة عن مشاهدة العنف و القتل
و الشجار"
1- إن الطفل يكون بيشوف الضرب والعنف وكمان بيشوف ناس بتشجع العنف ده
وبتتابعه وميعرفش إيه سببه أو مبرراته
وده موجود في مسلسل ارطغرل لأنه مش بيتعرض
باللغة المصرية يعني الطفل فى الغالب بيكون مش فاهم ليه القتل ده
2- إن الطفل يشوف العنف والقتل بيتعزز وغير متبوع بعقاب و ده للأسف في
مسلسل أرطغرل لأن الحروب دى بتكون غير متبوعة بمحاكمات مثلًا، بالعكس ممكن تكون متبوعة
بـ احتفال!
3- إن ولي الأمر يتحمس ويشارك الطفل في العنف
يعنى بابا يشتري عدد 2 سيف و خنجرين وبعد
ما الحلقة تخلص بابا يقول للطفل تيجى نعمل زي أرطغرل وبابا و الطفل يبارزوا بعض بالسيف
ويبقى #مين_نينچا_ناو
طب إيه الحــل؟
حاول بقدر الإمكان تبعد ابنك عن مشاهدة
العنف والقتل والضرب في أى مشهد بقى مش بتكلم عن أرطغرل لوحده
طيب لو مقدرتش امنع الطفل عن المشاهدة؟!
يبقى النصايح دي ليك..
1- فَهِّم الطفل أسباب اللي كان بيحصل قدامه، عرفه الحروب كانت بتحصل
زمان ليه وإيه موقعها دلوقتي.. إلخ
2- انت كـ ولي أمر متشاركش الطفل في عنف اطلاقًا
3- احكي للطفل قصص عن التسامح ومساعدة الغير
#ملحوظات☝
• أرطغرل كان مجرد مثال هادف لأنه واخد
تريند الأيام دي، دورك تعمم كلامي على كل الافلام والمسلسلات والكارتون اللي محتواه
فيه عنف وقتال
• فعليًا اتعاملت كـ متخصص مع أطفال كتير
عندهم عدوانية وعنف بسبب الأفلام العنيفة.. المشكلة انتشرت ولازم نواجهها
• أكتر فئة بتتأثر بمشاهدة العنف بسرعة
هما
الأطفال صغار السن أقل من 8 سنوات تقريبًا
الأطفال والمراهقين من ذوى الاحتياجات الخاصة
وخصوصًا لو نسبة ذكائهم منخفضة
فـ يُفَضل دول نبعدهم عن المشاهدة تمامًا
ميجا رقم ( 12 )
هتكلم معاكم عن استراتيچيات تعديل سلوك
العدوانية والعنف والتنمر
ملاحظات قبل ما نتكلم عن الاستراتيچيات:
1- " إذا عُرِفَ السبب بَطُل العجب ''
يعني هندور على أسباب السلوك اللى عند الطفل
سواء كان عدوانية أو عنف أو تنمر ونعالج السبب ده
مثلًا لو السبب في عنف الطفل إن بابا كل
شوية يضرب ماما قدامه يبقى لازم أمنع ضرب بابا لماما قدام الطفل
وبعد كده نبدأ نستخدم الاستراتيچيات اللي
هقولها
2- العدوانية أو التنمر أو العنف ليهم مظاهر كتير يعني ممكن يظهروا في
شكل ضرب أو أقوال غير سوية (شتم وسب....إلخ)
فـ هحدد المظاهر اللي بتظهر عند الطفل واستخدم
معاها الاستراتيچيات والضرب هيكون مثالنا في كل الإستراتيچيات اللى هنستخدمها لأنه
من أكثر المظاهر الشائعة عند الأطفال والمراهقين
3- لازم ثم لازم ثم لازم نبعد عن العقاب الجسدي للطفل العدواني أو المتنمر
أو العنيف لأن ببساطة جدًا مينفعش أكون عنيف معاه واطلب منه يبطل عنف
الاستراتيچيات:
1- استراتيچية التجاهل:
ودي بستخدمها لما يكون السلوك لسه في المرحلة
الأولى لأن ممكن يكون الطفل بيعمل كده علشان يجذب انتباهنا يعنى لما أشوف ابني بيضرب
أخته الصغيرة أسيبه؟! لا طبعًا أنا قصدي تجاهل ما بعد السيطرة على الموقف
يعنى وهو بيضرب اخته امسكي إيده وقولي له
تعالى ساعدني في المطبخ
📌ساعدنى فى المطبخ
"بمثابة عقاب مبهم"
📌تعالى العب game على اللاب "ده تعزيز اوعى تستخدميه"
2- توظيف الطاقة:
ودي أفضل طريقة للتفريغ الإنفعالى ، يعني لو الطفل شايف نفسه قوي فـ بيتنمر
على الضعيف يبقى نوظف القوة في الچيم أو نوديه يتمرن سباحة أو يلعب كورة "المهم
الطفل يفرغ انفعالاته"
3- حكي القصص:
يعني هنحكي للطفل قصص عن الولد الحلو اللي
بيحب كل الناس و مش بيضرب حد.. وقصة كبيييرة جدًا من ضمن شخصياتها ولد وحش بيضرب الناس
من غير سبب وفجأة الناس بقت بتكرهه ودخل السجن في الآخر
" مهم يكون عندك كاريزما وانت بتحكي
القصة حسس الطفل إن القصة واقعية "
4- التنفير:
بنفر الطفل من السلوك غير السوي ده مش هيكون
عندك صحاب والناس كلها مش هتحبك
تعرف إن القوي هو اللي يعرف يسيطر على غضبه
يعني لما تكون متضايق في نفس الوقت متؤذيش حد انت كده فعلًا راجل قوي
"التنفير بكلام واسلوب مناسب يخاطب
عقل الطفل"
5- المد بالمعلومات:
بنستخدم الاستراتيچية دي لما يكون الطفل
كبير شوية أكبر من 9 سنوات مثلًا، بعلمه المعلومات اللي تساعده على السيطرة على غضبه
6- الإرشاد الأسري:
هنا بقى بعرف الأسرة على الأسباب اللي ساعدت
ابنهم على اكتساب السلوك غير السوي علشان يمنعوا استمرار الأسباب وبقولهم على ارشادات
ونصايح يعملوها مع الطفل فى البيت وبفهمهم الدوافع النفسية خلف السلوك غير السوي
7- تبادل الأدوار:
ممكن أخلي الطفل يغمض عينه و يتخيل موقف
حصل بينه و بين أى شخص ونطلب منه يتخيل إن الشخص ده ضربه من غير سبب وبعد ما يفتح عينه أخليه يقفلها تاني و
يرشد الشخص ده ان السلوك ده غلط ويعلمه ازاي يبطل السلوك ده
8- الإرشاد الديني:
هقول للطفل موقف الدين من العنف أو العدوانية
أو التنمر وان ربنا بيحب الناس الطيبة اللى بتسامح وهكذا
9- العقاب:
وهنا مش هستخدم عقاب جسدي وكمان يفضل أبعد
عن العقاب المعنوي
طيب أعاقب ازاي؟
⬅ احرميه من جزء من مصروفه لو ضرب حد
10- التعاقد السلوكي مع السحب التدريجي:
وهنا هكتب تعاقد مع الطفل واللي ينقض التعاقد
هيدفع الشرط الجزائي
"بيزنس إز بيزنس"
ونقول خطوات التعاقد
● بنحدد درجة الأعراض عند الطفل "
مثلًا الطفل بيضرب 5 أطفال في اليوم"
● هتفق على بنود التعاقد مع الطفل
"ميضربش حد خالص طول اليوم"
● هتفق معاه على المعزز
"هياخد المعزز لو مضربش حد خالص طول
اليوم، وهيتحرم منه لو ضرب طفل أو طفلين على مدار اليوم"
● هنتفق معاه على عقاب "هيتعاقب لو
ضرب أكتر من طفلين على مدار اليوم"
أناا كده بعمل ''سحب تدريجى للسلوك'' يعني
بصغر حجمه كل يوم عن اليوم اللي قبله لحد ما السلوك يختفي خااالص
ميجا رقم ( 13 )
'' لو خلصتلى الموضوع دة يبقى ليك الحلاوة
'' لو ماسمعتش الجملة دى قبل كدة يبقى انت مش معانا على المجرة
هتكلم مع حضراتكم عن '' استراتيجية
التعزيز ''
التعزيز من أكتر الاستراتيجيات المعروفة
اللى كل الناس بتستخدمها مش بس الأخصائيين ، و كمان التعزيز ممكن نستخدمه لأكتر من
هدف :
1- لحذف السلوك الغير سوى أو التقليل من حجمه ( اطفاء السلوك الغير سوى
)
يعنى المعزز بيساعدنى اعمل اطفاء للسلوك
المشكل !؟ اها إيه رأيك تقول للطفل متعملش كدة تانى ، و لو نفذ كلامك تجيبله عجلة 🚲
2- بهدف خلق سلوك سوى للطفل ، إيه رأيك لو الطفل صلى تزود مصروفه .
3- تعزيز سلوك سوى موجود أصلا عند الطفل ، و انا بعززه بهدف الحفاظ على
السلوك دة أو زيادة حجمه ، طيب إيه رأيك تجيب للطفل شكولاته عشان كان بيزاكر النهاردة
.
طيب إيه أنواع التعزيز ؟
طبعا فيه معزز مادى زى الفلوس و الشكولاته
، و معزز معنوى زى الحضن و الابتسامه و التشجيع اللفظى ... و لكن فيه نوعين رئيسيين
من التعزيز :
1- التعزيز الموجب :
يعنى تقدم للطفل شئ بيحبه ( مادى أو معنوى
) ، تحضنه او تديله فلوس مثلا ...
2- التعزيز السالب :
يعنى تمنع الطفل عن شئ بينفر منه ( مادى
أو معنوى ) ، مثلا لو ماما بتخلى البنوتة الجميلة كل يوم تساعدها فى شغل البيت و البنوتة
بتنفر من شغل البيت ، يبقى ممكن ماما تعززها و تقولها مش هتساعدينى النهاردة فى شغل
البيت عشان انتى شطورة
طيب ممكن المعزز يفقد قيمته ؟ اها طبعا
، المعزز يفقد قيمته فى الحالات دى 👇
1- لو بتعزز الطفل بحاجة أصلا متوافرة معاه ، مثلا لو الطفل كل يوم بياكل
شكولاته و يعمل سلوك حلو فاتجيبله شكولاته .
2- لو انت اللى بتكرر نفس المعزز مع الطفل ، مش معقول كل ما الواد يعمل
حاجة كويسة تديله شكولاته .
ملاحظات :
1- " انت محدش يتوقعك '' يعنى تنوع فى المعززات و تغيرها بشكل مستمر .
2- يستحسن تخلى المعزز مفاجئ للطفل .
3- اوعى تستخدم اسلوب الشرط . لو عملت كذا هجيبلك كذا ، علشان المعزز
كدة هيتحول لرشوة .
4- شوف الحاجة اللى ناقصه الطفل و عززه بيها ، مثلا لو الطفل ماما شديدة
عليه عززه انت بالحضن و الطبطبه .
ميجا رقم ( 14 )
هتكلم مع حضراتكم عن '' استراتيجية
العقاب ''
العقاب من اكتر الاستراتيجيات الشائعة المستخدمة
فى تعديل السلوك ، ولكن العقاب ليه ضوابط لازم ناخدها فى عين الاعتبار علشان العقاب
ميضرش الطفل ( الحالة ) .
فاكر زمان أيام ابتدائى لما كنا بنغلط مع
مدرس الفصل كان بيجيب العصاية و يلويها كتير علشان تكون طرية و يقولك متنشفش ايدك عشان متوجعكش جامد
. ازاى دة ! مع ان المدرس بيعاقبك فعاوز يوجعك ! تعالوا نتكلم عن ضوابط العقاب :
1- العقاب يتبع السلوك الغير سوى مباشرة ، علشان عقل الطفل يربط بين
السلوك الغير سوى و العقاب . يعنى مينفعش الطفل يعمل حاجة غلط النهاردة فاضحك و اعدى
الموضوع ، و بكرة اعاقبه .
2- لازم العقاب يكون موجه بهدف تعديل السلوك ، يعنى انا كأخصائى أو أم
أو أب أعاقب الطفل علشان عمل سلوك غلط مش عشان اطلع الغل و الزهق بتاعى فى الطفل
3- لو استخدمت العقاب الجسدى لازم تبعد عن مناطق الكرامة ، يعنى متضربش
على الوش و تحت الحزام و القفا.
4- قبل ما تعاقب يكون الطفل فاهم انه عمل حاجة غلط و بالتالى بيتعاقب
عليها ، و بعد العقاب تفهمه ايه السلوك البديل للسلوك الغير سوى .
5- ياااريت ماتضربش الطفل بسبب و منغير سبب ( العقاب دايما موجه علشان
لا يفقد فاعليته )
6- نوع فى أساليب العقاب بتاعتك ، مش لازم كل ما الواد يغلط تضربه .
عشان الواد كدة يكرهك و كمان الضرب الكتير ممكن يخليه طفل عدوانى .
طيب هل فيه أنواع للعقاب ؟ اها طبعا ولكن
بعيدا عن العقاب الجسدى و المعنوى و المادى تعالو نتكلم عن نوعين رئيسيين :
1- العقاب الموجب :
و هنا بقدم حاجة للطفل ينفر منها ، مثلا
تكشر فى وشه أو الضرب أو توقف الطفل فى النوتى كرونار .
2- العقاب السالب :
و هنا بحرم الطفل من حاجة بيحبها ، مثلا
مش هتاخد مصروفك عشان عملت كذا .
و أخيرا ، كل طفل وليه طبيعته و انفعالاته
يعنى لازم تنتقى الاستراتيجية اللى هتعدل بيها السلوك ، مش كل الاطفال بينفع معاها
العقاب و العكس صحيح فيه أطفال مش بينفع معاها غير العقاب ، و لكن بنصح بإننا نخلى
العقاب آخر استراتيجية نستخدمها .
يجا رقم ( 15 )
هتكلم معاكم عن '' استراتيجية
الإرشاد ''
الإرشاد ليه أكتر من شكل و أكتر من نوع
، هنتكلم دلوقتى بزاوية و نظرة سلوكية عن :
● الإرشاد الزواجى .
● الإرشاد الأسرى .
● الإرشاد الدينى .
1- الإرشاد الزواجى :
إيه رأيكم نعمل برنامج لأى اتنين مقبلين
على الجواز أو أى اتنين متجوزين و لسه مخلفوش ؟ البرنامج دة هيكون عبارة عن ارشادات
و نصايح للتعامل بينهم ( تعامل صحيح علشان الطفل ميبقاش معقد نفسيا و سلوكيا ) و كمان
نعلمهم ازاى يتعاملوا مع طفلهم المستقبلى و ازاى يكون رد فعلهم على سلوكياته .
2- الإرشاد الأسرى :
طيب ايه رأيكم لو الاتنين اتجوزا و خلفوا
بيبى جميل ممكن اقدملهم برنامج إرشادى بردو يعرفهم ازاى يتعاملوا مع الطفل و ازاى
يكون رد فعلهم على سلوكياته و ازاى يتعاملوا مع بعض قدام الطفل . و من خلال الإرشاد الأسرى لو حصلت المشكلة
السلوكية ، بعرفهم إيه طبيعة المشكلة ( السلوك الغير سوى ) و بعرفهم أسبابها ، و بوجه
نصايح و ارشادات للأسرة إزاى يتصرفوا مع السلوكيات الغير سوية لأولادهم و إزاى يعدلوها
.
الحقيقة ان الإرشاد الزواجى و الإرشاد الأسرى
من أعظم الإستراتيجيات اللى بتقلل جدا من احتمال اكتساب الطفل سلوك غير سوى .
3- الإرشاد الدينى :
من أول هنا بقا اللى فات حمادة و اللى جاى
حمادة تانى
الإرشاد الدينى استراتيجية بستخدمها لتعديل
السلوك و لكن بتكون مع اللى عمرهم كبير شوية من أول عمر 8 سنوات تقريبا . و كمان الإرشاد
الدينى بيكون موجه للحالة مش للأسرة . فى الإرشاد الدينى بعرض على الحالة رأى
الدين فى السلوك الغير سوى مثلا السرقة او الكذب و كمان بعرض عقوبتها ، و طبعا مش هنسى
أقول ان ربنا غفور رحيم بيقبل عباده التوابين 💚 .
ملاحظة ☝
لو انت أخصائى و الحالة فى عمر المراهقة
، اركن الإرشاد الدينى لآخر الخطة خااالص ، حااول تخلى إستراتيجية الارشاد الدينى آخر
كارت لتعديل السلوك .. لأن فى الغالب قبل ما الحالة تجيلك مصر كلها قالتله على رأى
الدين فى السلوك اللى عنده و فى الغالب بردو بيقولوا رأى الدين بأسلوب مش مناسب ..
فمتبدأش بيها كمعالج علشان الحالة متقفلش منك
ميجا رقم ( 16 )
هتكلم مع حضراتكم عن '' استراتيجية
تبادل الأدوار ''
ما تيجى تقعد مكانى أحسن . استراتيجية تبادل الأدوار أنا شخصيا بعشقها ، ليها فاعلية كبيرة جدا فى تعديل السلوك
و فى نفس الوقت ممتعة للطفل . نقول أمثله و بعدين نشرح :
1- إيه رأيك لو الولد عنده سلوك السرقه ندخله فى الشرطة المدرسية و يبقى هو المسئول عن أمن الفصل و هو اللى يجيب كل المسروقات .
2- طيب إيه رأيك لو بردوا الطفل بيسرق و عملت مسرحية فى المدرسة و دخلت
الطفل فى المسرحية بدور الظابط اللى بيقبض على الحرامى و يسجنه .
تبادل الأدوار يعنى بلبس الطفل دور الشخص
اللى بيحارب السلوك الغير سوى . و طبعا منغير ما يكون واخد باله ان انا بعالجه من كدة
، يعنى هو يكون عارف ان انت متعرفش انه عنده السلوك الغير سوى ( تبادل الأدوار بالصدفة
مثلا ) .
تبادل الأدوار بيكون من أنجح الإستراتيجيات
لتعديل السلوك و خاصة لو السلوك الغير سوى فى المرحلة الأولى أو الثانية .
ميجا رقم ( 17 )
هتكلم معاكم عن '' استراتيجية
التجاهل ''
أكيد كلنا فاهمين كويس يعنى إيه تجاهل ؟!
يعنى تعمل نفسك مش واخد بالك من السلوك الغير سوى . و كمان السلوك الغير سوى مينفعش
يغير من حالتك الإنفعالية ، مثلا لو الطفل عمل سلوك غير سوى هتعمل نفسك مش واخد بالك
منه و السلوك فشل انه يجذب انتباهك و كمان مش هتكشر أو تزعق .
التجاهل بنستخدمه إمتى ؟ لما يكون السلوك
الغير سوى فى أول مرحلة ( يعنى السلوك الغير سوى جديد على الطفل ) .
طيب ليه بستخدم التجاهل فى المرحلة الأولى
؟! لان قد يكون الطفل عمل السلوك بشكل عفوى و مش قاصده أساسا فلو انت انتبهت للسلوك
الطفل هيعرف انه بيجذب انتباهك و يبدأ يكرره ، و كمان قد يكون هدف الطفل من السلوك
انه يجذب انتباهك فمتحققش هدفه عشان ميكررش السلوك .
يعنى لو شوفت ابنى بيضرب اخته الصغيرة اتجاهل
الموضوع و اسيبه يضربها !؟ لا طبعا ، هنا بنعمل حاجة اسمها '' تجاهل ما بعد السيطرة
على الموقف '' و كمان التجاهل هنا مصحوب'' باستراتيجية الإلهاء ''
يعنى هتمسكى ايد ابنك و بدون عصبية أو تعبيرات
وش تبين انك انتبهتى للسلوك ، تقوليله تعالى يا حمادة عاوزاك :
⬅ تساعدنى فى المطبخ ( بمثابة عقاب مبهم )
⬅ هجيبلك لعبة على اللاب ( دة تعزيز ، أوعى تعمليه )
و أخيرا '' التجاهل '' فى أغلب الأوقات
هتستخدم معاه '' الإلهاء '' ، و كمان التجاهل بيكون ناجح جدا مع الطفل العنيد .
طيب و بعد التجاهل ؟ استخدمى مثلا استراتيجية
حكى القصص و لكن بعد فترة من الموقف ( بعد يوم مثلا )
ميجا رقم ( 18 )
هتكلم مع حضراتكم عن '' التعاقد
السلوكى ''
التعاقد السلوكى من أفضل الاستراتيجيات
اللى ممكن نستخدمها مع طفل أو مراهق عنده الدافعية لتعديل سلوكه ، و احلى حاجة فى التعاقد
السلوكى إنها بتخلى الحالة رقيبه على تصرفاتها و سلوكياتها .
طيب يعنى إيه تعاقد سلوكى ؟ دى عبارة عن
عقد أو اتفاقية بينك و بين الحالة ، في الاتفاقية بتحددوا مجموعة بنود و نصايح الحالة
تلتزم بيها .
بس كدة !؟ لا ، لو الحالة أهملت بنود الاتفاقية
بتدفع الشرط الجزائى ( عقاب ) ، و لو التزمت بالبنود بتتعزز . و طبعا العقاب و التعزيز
أنا بحددهم على حسب عمر الحالة .
ملحوظة ☝
1- التعاقد السلوكى فى الغالب بيكون مش
ناجح مع الطفل العنيد .
2- مش لازم نكتب التعاقد بالورقة و القلم
.
3- لو كان السلوك بيتكرر كتير او حجمه كبير
، ممكن اعمل تعاقد سلوكى و استخدم معاه استراتيجية '' السحب التدريجى ''
مثال : لو طفل عنده سلوك لفظى غير سوى بيتكرر
أكتر من 20 مرة فى اليوم ، اعمل تعاقد سلوكى للنهاردة ان الطفل ميقولش السلوك الغير
سوى طول اليوم ، و لو قالها 10 مرات كدة هو مش هيتعزز و مش هيتعاقب ، و لو قالها اكتر
من 10 مرات هيتعاقب ، و لو قالها اقل من 10 مرات يتعزز . وهكذا كل تعاقد سلوكى أقلل
فى العدد إلى أن يختفى السلوك بشكل تدريجى .
ميجا رقم ( 19 )
هتكلم معاكم عن '' استراتيجية التنفير
''
من أبسط استراتيجيات تعديل السلوك اللى
ممكن تستخدمها و كمان فعالة جدا .
طيب يعنى إيه تنفير ؟ يعنى تقعدى مع الطفل
و تتكلمى معاه فى قد إيه السلوك الغير سوى اللى بيعمله مضر ليه و هيخلى أصحابه يبعدوا
عنه و هكذا . يعنى لو الطفل عنده سلوك مص الأصابع حطيله
صبار على صوابعه ، لو مراهق بيشرب سجاير نحطله مادة مرة جوة السجارة علشان ينفر منها
.
ملحوظات ☝
1- الطفل لو حس للحظة انك عاوزه يترك السلوك
الغير سوى عشان بيضايقك ( يعنى انت عاوزه يترك السلوك لمصلحتك ) يبقى الطفل مش هيترك
السلوك الغير سوى أبدا .
2 - و انت بتنفر الطفل من السلوك الغير
سوى ، لازم يكون كلامك كله لمصلحة الطفل ، عرفه انه أغلى حاجة فى حياتك و انك بتحبه
عشان يترك السلوك الغير سوى .
3 - ممكن ندمج التنفير مع '' حكى القصص
'' لو الطفل لسه فى المرحلة الأولى و انت عاوز تستخدم التنفير ، يعنى تحكيله قصة واحد
من شخصياتها بيعمل السلوك الغير سوى علشان كدة حصله كذا وكذا .
ميجا رقم ( 20 )
هتكلم معاكم عن استراتيجية ''
المد بالمعلومات ''
بنطبقها إزاى ؟ بجمع كل المعلومات عن السلوك
الغير سوى و بقولها للطفل او للمراهق ( الحالة ) بطريقة تخاطب عقله ، يعنى بطريقة يفهمها
. يعنى بنعرف السلوك الغير سوى و ازاى يقدر يتكيف معاه أو ازاى يقدر يتعافى منه و إيه
هى الاسباب وراء إكتساب السلوك و إيه هى عواقب السلوك دة ... إلخ
استراتيجية المد بالمعلومات بتكون فعالة
مع المراهقين و كبار السن . بتكون فعالة بردو مع الأطفال اللى عمرهم كبير نسبيا ولكن
بنستخدم معاها استراتيجيات تانية تتناسب مع نوع السلوك .
ملحوظة ☝
1_ يااريت و انت بتمد الحالة بالمعلومات
عن السلوك الغير سوى ، تكون على الحياد و يكون معلوماتك كلها صحيحة ، و كمان ماتقولش
جزء صغير من المعلومات و تهمل الباقى .
2_ أسلوبك وانت بتتكلم مع الحالة يكون متناسب
مع عقلية الحالة .
ميجا رقم ( 21 )
هتكلم معاكم عن سلوك '' الكذب
عند الأطفال ''
علشان نعدل سلوك الكذب عند الأطفال لازم
نحدد سبب الكذب و نعالج السبب و بالتالى الكذب هيقل جدا ، و دى بعض أسباب الكذب :
1- النمذجة الخاطئة للطفل . يعنى لو انت قاعد مع الطفل فى البيت و اتصل
بيك زميلك فى الشغل و قالك ، انت فين دلوقتى ؟ أنا فى الطريق أهو . انت كدة زرعت فى
الطفل بوادئ الكذب .
2- عقاب الطفل بشكل قاسى جدا و دائم عند ارتكاب سلوك خاطئ . يعنى بتضربه
قوى على الفاضى و المليان . و دة ممكن يدفع الطفل على الكذب علشان يتجنب العقاب .
3- اهمال الطفل و تهميشه . يعنى مثلا لو انت مهتم جدا بأخ للطفل و مهمل
للطفل ، هتلاقيه بيكذب و بيقولك حاجات غلط عن أخوه علشان يكرهك فيه .
طيب افرض انا عالجت السبب . هل الطفل ممكن
يكون لسه هيكذب تانى ؟ أها فى بعض الأحيان . و دة بسبب ان الكذب أصبح عادة عند الطفل
و بقا على لسانه علطوا . فى الحالة دى و كمان فى حالة لو انت معرفتش تلاقى السبب ممكن
تستخدم معاه الاستراتيجيات دى :
1- استراتيجية التجاهل :
استراتيجية التجاهل فعالة جدا و خاصة لو
الطفل لسه فى المرحلة الأولى من السلوك . و هنا أنا هتجاهل كل الكلام الكاذب اللى بيقوله
الطفل و كمان هتجاهل رد الفعل .
مثلا الطفل دلوقتى كسر الكباية و جاى يقولك
ان أخوه الطغير كسر كباية '' بهدف انك تضرب أخوه '' ، ممكن حضرتك تقوله بكل هدوء ،
حاضر يا حبيبى متقلقش انا هقوم أشيلها عشان متتعوروش . و انت بتشيلها بقا اتكلم قدامهم
بصوت عالى منغير ما توجه كلام لحد منهم ان كسر الكباية سلوك خاطئ جدا و مينفعش يتكرر
تانى .
2- استراتيجية حكى القصص :
حكى القصص بردو ممكن استخدمها لما يكون
الطفل فى المرحلة الأولى من السلوك . مثلا باليل اقعد انت و الطفل الكاذب و أخوه التانى
. و احكيلهم قصة كبيرة جدا و من ضمن شخصيات القصة طفل كان بيكذب و كل الناس و اصحابه
بعدوا عنه و هكذا تنفير فى القصة .
3- استراتيجية التنفير :
و هنا علشان استخدم التنفير بشكل مباشر
و مركز بدون قصة ، يستحسن يكون الطفل فى المرحلة التانية للسلوك . و هنا بقعد مع الطفل
و اقوله سلبيات الكذب و عواقبه السلبية و طبعا بأسلوب بسيط يخاطب عقل الطفل .
4- استراتيجية المد بالمعلومات :
بردو هنا يستحسن يكون بعد المرحلة الأولى
للسلوك . و هنا عرفه ان الصدق هيرفع مقامة و الصدق جزء من الشجاعة ، و عرفه كل حاجة
عن الكذب تعريفه و ازاى هتساعده فى تعديل السلوك و هكذا .
ملحوظة ☝
متقولش أسباب الكذب للطفل أثناء المد بالمعلومات
، و ممكن تكتفى انك تظهرله حل السبب الخاص بيه . مثلا لو السبب انك مهتم جدا بأخو الطفل
، هتقوله انا بحبك جدا و الله يا حبيبى و تاخده فى حضنك و تعرفه ان انت بتحب أخوه قده
.
5- استراتيجية الارشاد الدينى :
و هنا هنتكلم مع الطفل و هنقوله رأى الدين
فى سلوك الكذب . و لازم نسيب الكذب عشان ربنا يحبنا و ندخل الجنة .
6- استراتيجية العقاب :
و دى هندمجها مع التعاقد السلوكى ، و لكن
يفضل نبدأ الأول بالعقاب السالب ( تاخد منه حاجة بيحبها ) . لو العقاب السالب مجبش
نتيجة يبقى نتجه للعقاب الموجب ( تقدم للطفل حاجة بينفر منها )
7- استراتيجية التعزيز :
و هنا بقا بنعزز الطفل على الحاجات الصادقة
اللى بيقولها على مدار اليوم ، و نوع فى المعززات و حاول تخلى أكترها معنوى يعنى بوسه
، حظن ، طبطبه على الكتف ، ابتسامه . و كمان ممكن ندمج التعزيز مع التعاقد السلوكى
.
8- التعاقد السلوكى مع السحب التدريجى :
هنا هنعمل تعاقد مع الطفل و نتفق على البنود
و على أساليب العقاب و التعزيز ، و امتى هعاقبه و امتى هعززه .
و يستحسن تعمل سحب تدريجى للسلوك فى التعاقد
يعنى مثلا اليوم الاول الكذب مش اكتر من 5 مرات ، اليوم التانى مش اكتر من 4 مرات وهكذا
لحد ما تعمل تعاقد فى يوم ان الطفل مايكدبش خااالص طول اليوم . و بكدة السلوك هيتلاشى
تدريجيا إلى أن يختفى بإذن الله .
ميجا رقم ( 22 )
هتكلم معاكم عن سلوك '' مص الأصابع
''
لازم نكون متفقين ان سلوك مص الأصابع بيكون
سلوك غير سوى فى اطفال ما بعد 3 سنوات ، و على الجانب الآخر بيكون سلوك طبيعى للأطفال
اللى عمرهم أقل من 3 سنوات .
إيه السبب ؟ لأن الطفل فى أول 3 سنوات من
عمره بيتعرف على كل ما يحيط بيه عن طريق وضعه فى الفم ، فمن الطبيعى انه علشان يتعرف
على ايده كل شوية هتلاقيه حاطط صابعه فى بوقه . و طبعا ممكن مص الأصابع يظهر فى السنه
الأولى للطفل او يظهر لطفل عنده سنتين على حسب الطفل نفسه . المهم انه قبل 3 سنوات
بيكون سلوك طبيعى .
طيب دلوقتى الطفل أكبر من 3 سنوات و عنده
سلوك مص الأصابع ، أعمل إيه ؟ نطبق استراتيجيات تعديل السلوك :
1_ استراتيجية التجاهل :
التجاهل بستخدمه زى ما احنا عارفين فى المرحلة
الأولى من السلوك لان قد يكون مص الأصابع فى اول عدة مرات سلوك عفوى من الطفل أو غرضه
انه يشد انتباهك بسبب إهمالك ليه .
طيب ليه أتجاهل ؟! مثال : دلوقتى انتى دخلتى
المطبخ لقيتى ابنك اللى أكبر من 3 سنوات حاطط صباعه فى بوقه ، برقتيله و السلوك جذب
انتباهك فالطفل عرف ازاى يجذب انتباهك فهيكرر السلوك ، و فى الحقيقة قبل ما انتى تدخلى
المطبخ كان الطفل فاتح الثلاجة و فتح برطمان العسل🍯 و حط صباعه
فيه و دلوقتى حط صباعه فى بوقه علشان يتزوق العسل . هنا دة سلوك عفوى ممكن لو انتبهتيله
تحوليه من عفوى لتكرارى .
2 _ استراتيجية حكى القصص :
هنا هنحكى للطفل قصة قبل النوم ، قصة كبيرة
جدا و من ضمن شخصياتها طفل صغير كان بيحط ايده فى بوقه و دة سببله أمراض و بقا بياخد
حقن💉 و الدكتور مانع عنه الشكولاته و الحاجات الحلوة و هكذا ( بأسلوب يخاطب عقل
الطفل )
3 _ استراتيجية التنفير :
هنا بقا بستخدم مادة المر أو أى مادة طعمها
مش حلو '' زى زيت الصبار '' و أحطهاله على الصابع اللى الطفل بيحطه فى بوقه . و فهمى
الطفل انك حطاله المادة دى علشان بتحبيه و مش عاوزاه يكرر السلوك تانى عشان ميتعبش
و ياخد حقن و هكذا ..
4 _ التعاقد السلوكى مع السحب التدريجى
:
هنا بقا هنتفق مع الطفل إتفاق رجالة ، انه
ميكررش السلوك فى اليوم أكتر من 5 مرات مثلا علشان ياخد '' معزز '' و لو اكتر من 5
مرات مش هياخد المعزز و هيخسر اللعبه فهخصم منه نص مصروف بكرة . و فى اليوم اللى بعده
ميكررش السلوك أكتر من 4 مرات و هكذا أعمل سحب تدريجى للسلوك مع التعزيز و العقاب إلى
أن يختفى السلوك .
ميجا رقم ( 23 )
✅ تخيل المواطن x واقف فى مكان معين، و موجود فى المكان ده أسد، المواطن x لما شاف
الأسد خاف وانتابه شعور القلق وده سببه إنه خايف من الأسد وده طبعًا خوف طبيعي، مين
فينا مش بيخاف من الأسد؟
▪️المواطن x هنا طبيعى لأن ده موقف يقيني .
✅ تخيل بقى معايا إن المواطن y
واقف في مكان معين بردو لكن مش موجود فيه حد أو حاجة خالص، يعني المواطن
y لوحده،
والمواطن y خاف وانتابه شعور القلق وده سببه انه تخيل ان موجود فى المكان ده عفريت
وهينتقم منه (ده غير ان عنده محكات تانية أصلًا)
▪️
المواطن y هنا يعاني من اضطراب القلق لأن ده موقف غير يقيني .
هو يعني إيه اضطراب القلق أصلًا؟
#اضطراب_القلق
- هو تقدير احتمالية العواقب السلبية فى
المواقف اللايقينية
- هو الميل لتفسير الغامض بشكل سلبي
📌
الاشخاص مرتفعي القلق لديهم انحياز في الانتباه تجاه المثير المُهَدِد
أكثر من غيرهم من الأسوياء بما يسمى بـ #اليقظة_الزائدة زي ما شوفنا في مثال X وY
🚷ملحوظة
المثال لتوضيح اضطراب القلق بشكل مبسط جدًا،
وفيه أنواع وأبعاد وخصائص وأعراض ومحكات متعددة للقلق
انتظروا ميجا بكرة عن تعديل سلوك القلق
.
ميجا رقم ( 24 )
هتكلم مع حضراتكم النهاردة عن '' القلق
''
لازم تدور على سبب القلق علشان لو قدرنا
نتحكم فى السبب هنقدر نعدل سلوك القلق . يعنى مثلا ممكن يكون سبب القلق هى ماما علشان
كل شوية تقول للطفل اسكت علشان العفريت هيجى يحرقك او أبو رجل مسلوخة هيموتك . ياااريت متكونش انت مسبب القلق لابنك عن
طريق تخويفه بشئ مش موجود قدامه او حتى بشئ موجود قدامه . و كمان خليك نموذج كويس يعنى
الطفل اللى هيشوف أمه بتخاف تنام فى الظلام أكيد هيقلق و يخاف ينام فى الظلام .
هتكلم معاكم دلوقتى على استراتيجيات ( نصائح
) تستخدموها مع الطفل اللى بيعانى من سلوك القلق :
1- هنقعد مع الطفل و نفهمه ان الحاجة اللى بيقلق منها مبتضرش او ملهاش
وجود أصلا ، و هنقوله معلومات عن الحاجة اللى بيقلق منها . ( عفاريت مثلا )
لو قدرت تغير أفكار الطفل عن سبب القلق
، سلوك القلق هيتلاشى تماما .
2- قدم مساعدة لابنك فى المواقف اللى بيقلق فيها ، خليك جمبه ، يعنى
لو بيقلق و بيخاف لما ينام فى أوضه لوحده أدخل نام معاه و قبل ما تنام قوله احنا مع
بعض أهو حصل حاجة ؟ مفيش حاجة فى الأوضه تقلقك و ربنا موجود معانا فى كل مكان و أكيد
ربنا بيحمينا .
3- خليك نموذج إيجابى للطفل فى مواقف القلق ، يعنى لو الطفل بيخاف ينام
لوحده فى الأوضه قوله انت هتنام معانا و اختك هتنام النهاردة لوحدها فى أوضتك و نشوف
هيحصل إيه ، و الصبح يشوف اخته محصلهاش حاجة و نامت كويس و كله تمام .
4- حط الطفل فى موقف القلق لفترة قصيرة جدا و كل يوم كبر الفترة دى لحد
ما القلق يختفى . مثلا لو الطفل بيقلق ينام فى الأوضه لوحده يبقى النهاردة انت هتنام
معاه و قبل المعاد اللى بيصحى فيه بساعة قوم من جمبه و استناه بره ، و أول ما يصحى
قوله عامل إيه دلوقتى يا بطل انت نمت لوحدك ساعة كاملة . بكرة ينام لوحده ساعتين و
هكذا نطول فى المدة لحد ما ينام لوحده طول الليل .
5- لازم نعزز الطفل فى أى موقف صعب يعدى بيه و ميقلقش ، و لو قلق من
حاجة متستخدمش العقاب و لكن اتكلم معاه ان الحاجة دى مش بتضر و مش بتخوف و هكذا .
ملحوظة☝
لو القلق عند الطفل حجمه كبير لدرجة انه
ممكن يسبب تشنجات للطفل أو حالة بكاء شديدة ، أنصحك توديه لدكتور نفسى أو لأخصائى شاطر
.
ميجا رقم ( 25 )
هتكلم النهاردة عن '' الشقاوة Vs فرط الحركة
''
مش هتكلم كتير عن الفرق بين الشقاوة و فرط
الحركة و هكتفى بفرق واحد قوى جدا للتفرقة بينهم :
1- الشقاوة بيعمل أنشطة كتير جدا خلال يومه و لكن خطواته تجاه الأنشطه غير
مصحوبه بإندفاعية .
2- فرط الحركة بيعمل أنشطة كتير جدا خلال يومه و بتكون مصحوبه بإندفاعية
.
يعنى مثلا لو عندى طفلين عاوزين يروحوا
يجيبوا لعبة ، الطفل الأول بيجرى على اللعبة ولاحظ ان فيه فى طريقه حاجة كانت هتكعبله
فتجاوزها و تفاداها و متكعبلش و راح جاب اللعبة يبقى الطفل دة '' شقاوة '' ، الطفل
التانى ملحظهاش فاتكعبل فيها ووقع و قام بسرعة عشان يجيب اللعبه يبقى الطفل دة '' فرط
حركة '' علشان كدة فرط الحركة بيكون كثير التعثر
لانه عاوز يجيب الحاجة و مش ملاحظ الأشياء اللى موجودة فى الطريق .
طيب لو ابنى شقى اعمل إيه ؟ الشقاوة دى
عبارة عن طاقة ربنا وهبها لابنك فلازم توظفيها فى شئ ينفعه ، مثلا يلعب نوع من أنواع
الألعاب الرياضية . فلما أوظف الطاقة الزيادة فى الرياضة ، بعد ما يخلص وقت ممارسة
الرياضة هتلاقيه طاقته بقت عادية إلى حد ما .
طيب لو ابنى فرط حركة ؟ بردو هتوظفى طاقته
الزيادة فى نوع من أنواع الألعاب الرياضية زى السباحة أو الكورة مثلا .
و لكن المشكلة بالنسبة للطفل اللى عنده
فرط حركة إن عنده أعراض مصاحبة زى :
1- تشتت الإنتباه .
2- الإندفاعية .
3- قليل التركيز .
4- أعراض فردية أخرى .
فلما أكثر من عرض يتوفر فى نفس الطفل بيسبب
مشكلات زى إضطراب اللغة أحيانا .
طيب هعمل إيه مع الطفل اللى عنده فرط حركة
؟ ابعد كل البعد عن المهدئات ، بعد اذنكم أكررها
ابعد كل البعد عن المهدئات ، لان المهدئات بتأثر بالسلب على الطفل على المدى الطويل
. و كمان كل الاتجاهات الحديثة فى تأهيل فرط الحركة بتقول اننا لازم نوظف طاقة الطفل
الزيادة فى نوع من أنواع الألعاب
الرياضية ، و كمان نحاول نشغل الطفل كتير فى البيت ، هاتلى الكرسى من الأوضه .. ناولنى
المعلقة من المطبخ .. لو كان بيتعلم الحروف الأبجدية حطيلة كارت مكتوب عليه ( س ) فى
آخر الأوضه و قوليله دور على ( س ) و هكذا . خليه يلعب ألعاب فيها حركة تنمى قدراته
و مهاراته . و كمان نلعب معاه أنشطة لتنمية مهارة الانتباه
و التركيز ( مدى الانتباه _ مدة الانتباه ) و مش هلنزمك بنشاط محدد طبعا ، ادخل على
اليوتيوب هتلاقى عشرات الأنشطة . و طبعا لما ننمى مهارة الانتباه ، التركيز
هيزيد و كمان الاندفاعية هتقل .
و طبعا ممكن نستخدم استراتيجيات تعديل السلوك
لخفض الاندفاعية أو أى عرض مصاحب :
1- التعاقد السلوكى .
2- السحب التدريجى .
3- النمذجة و تبادل الأدوار .
ميجا رقم ( 26 )
هتكلم معاكم النهاردة عن '' التلفظ الغير
سوى ''
طبعا التلفظ الغير سوى سلوك منتشر جدا بين
الأطفال و المراهقين ، هقولكم النهاردة استراتيجيات تعديل سلوك التلفظ الغير سوى و
لكن قبلها نقول :
ملاحظات ☝
1- التلفظ الغير سوى سلوك مكتسب ، يعنى الطفل بيكتسبه نتيجه تكرار السلوك
قدامه و سماعه .
2- لو بابا ( مثلا ) بيقول ألفاظ غير سوية ( بيشتم ) قدام الطفل ، يبقى
لازم بابا يتعدل سلوكه قدام الطفل علشان الطفل يتعدل سلوكه .
3- لو الطفل اكتسب السلوك من الحضانه ، مش معنى كدة إنى أقعده من الحضانه
و أحبس الطفل فى البيت و امنعه من الإختلاط
طيب لو الطفل اكتسب السلوك من البيئة الخارجية
( حضانة مثلا ) اعمل إيه ؟ ببساطة جدا هخليه يبعد عن الأطفال اللى بتقول ألفاظ غير
سوية فى الحضانه ، و يبعد عن أصحابه اللى بتقول ألفاظ غير سوية فى أى مكان مش شرط حضانه
. إنما مش هنمنعه من الاختلاط و التفاعل الإجتماعى .
استراتيجيات تعديل سلوك التلفظ الغير سوى :
1- التجاهل :
طبعا هنتجاهل السلوك لما يكون فى المرحلة
الأولى ، لأن قد يكون غرض السلوك جذب الانتباه او قد يكون السلوك عفوى فلو انتبهت للسلوك
هعززه .
2- حكى القصص :
من أجمل الاستراتيجيات اللى ممكن نستخدمها
أثناء المرحلة الأولى للسلوك . هنقعد مع الطفل و نحكيلة قصة طويلة و أحد شخصياتها كان
بيقول ألفاظ غير سوية فأصحابه بدأوا يبعدوا عنه وهكذا .
3- التنفير :
استراتيجية التنفير بنستخدمها بعد انتهاء
المرحلة الأولى من السلوك ، بقعد مع الطفل بفهمه ان السلوك دة غلط و بيضر الطفل و هيخلى
أصحابه يبعدوا عنه و هقوله سلبيات السلوك .
4- العقاب :
لو الطفل قال سلوك غير سوى اكتر من مرة
قدامك ، قوله انت قولت حاجة غلط علشان كدة انت محروم من نص مصروفك بكرة ( مثلا )
ملحوظة ☝
العقاب يكون تدريجى ، يعنى بنبدأ بالسهل
على الطفل فالأصعب و دة الترتيب :
1- عقاب مادى سالب .
2- عقاب مادى موجب .
3- عقاب معنوى .
5- التعاقد السلوكى مع السحب التدريجى :
هنا هعمل عقد مع الطفل و هنحدد بنود العقد
، مثلا الطفل ميقولش ألفاظ غير سوية طول اليوم و لو قال 5 ألفاظ يبقى هو كدة خسر ولازم
يدفع الشرط الجزائى ( عقاب ) ، طيب لو قاله أقل من مرتين يبقى كدة الطفل كسب اللعبة
و نعززه . و نقلل فى عدد الألفاظ الغير سوية كل يوم ، إلى أن يتلاشى السلوك الغير سوى
تماما .
ميجا رقم ( 27 )
هتكلم مع حضراتكم النهاردة عن حل العائق
الأول من عوائق تعديل السلوك .
الولد مع الأخصائى بيكون قابل لتعديل السلوك
، و مع الأم بيكون صعب جدا و عنيد جدا . إيه السبب ؟ الفكرة ان الطفل عارف كويس قوى
ان الأخصائى بيكون حازم و شخصيته قويه و هينفذ معاه مختلف الاستراتيجيات و كمان هينفذ
التعاقد السلوكى ، أما الأم بيكون الطفل عارف انها حنينة و هتتهاون معاه و مش هتنفذ
التعاقد السلوكى فبيكون عنيد معاها .
طيب إيه الحل ؟ الحل الوحيد ان أنت كولى
أمر قائم على تعديل سلوك الطفل ( سواء أم أو أب أو ... ) لازم تكون حازم و شخصيتك قوية
على الطفل ، يعنى لما تعمل تعاقد سلوكى مع الطفل تنفذه مهما حصل و مهما الطفل عيط ،
و لما تقول للطفل هعاقبك عشان عملت ( سلوك غير سوى ) يبقى لازم تعاقبه و تنفذ كلامك
.
ملحوظة ☝
أوقات بيكون سبب تهاون الأم و تجاوزها عن
عقاب الطفل ، ان وقت ما الطفل عمل السلوك الغير سوى اتعصبت جدا و قالتله هعاقبك ، و
قالت عقاب كبير جدا على الطفل ( مثلا مش هتاخد مصروفك طول الأسبوع ) . فلازم العقاب اللى بنحدده يكون معقول علشان نقدر ننفذه و كمان لازم التعاقد السلوكى
يكون معقول علشان يحقق هدفه .
ميجا رقم ( 28 )
هتكلم معاكم النهاردة عن تانى عائق من عوائق
تعديل السلوك .
الطفل اكتسب السلوك الغير سوى من أحد أفراد
العائلة ( الأب مثلا ) . اعمل إيه ؟ لازم الفرد من العائلة دة يتعدل سلوكه علشان نعدل
سلوك الطفل .
طيب الفرد من العائلة دة مش متعاون أو مش
عارف يعدل سلوكه . اعمل إيه ؟ بصراحة دى بتكون مشكلة بتقف ضد تعديل سلوك الطفل ، يعنى
مش معقول هقول للطفل متسرقش و هو شايف أبوه بيسرق . بس ممكن نمشى على النقاط دى :
1- لو الفرد من العائلة صلة القرابه بيه بعيدة شوية ، ممكن نقلل جدا
من رؤية الطفل ليه .
2- لو الفرد من العائلة صلة القرابه بيه قريبة ( الأب مثلا ) يبقى ممكن
أخلى الأب هو اللى يعدل سلوك الطفل عن طريق '' التعاقد السلوكى ''
يعنى الأب هيقعد مع الطفل يقوله السلوك
الغير سوى اللى انا و انت بنعمله غلط و يقول الأسباب طبعا و يقوله انهم هيتنافسوا مع
بعض علشان يعدلوا السلوك الغير سوى .
و هنا الأب هيعمل تعاقد سلوكى مع الطفل
أنهم ميعملوش السلوك الغير سوى طول اليوم و لو السلوك اتكرر من أى حد منهم أكتر من
4 مرات خلال اليوم يبقى كدة خسر و هيدفع الشرط الجزائى للتانى . و قيمة الشرط الجزائى
بيساوى مصروف الطفل .
يعنى لو مصروف الطفل 5 جنيه
¤ الطفل كسب التعاقد ، هياخد بكرة مصروفه
10 جنيه .
¤ الطفل خسر التعاقد ، يبقى مش هياخد مصروفه
بكرة .
ميجا رقم ( 29 )
هتكلم مع حضراتكم النهاردة عن ثالث عائق
من عوائق تعديل السلوك .
الفرد القائم على تعديل السلوك ( الأم مثلا
) مش صبور و خلقه ضيق و عاوز السلوك الغير سوى يتعدل فى غمضة عين ، و بالتالى مش بيكمل
باقى خطة تعديل السلوك .
خلينا نكون متفقين ان أى حد ( كبير أو صغير
) لو عنده عادة سلوكية ( شرب السجاير مثلا ) أو لازمه كلامية بيكون من الصعب انه يعدلها
، و كذلك الطفل بيكون اتعود جدا على السلوك غير السوى فبيبقى محتاج وقت و مجهود كبير
علشان يعدل السلوك غير السوى .
يعنى تنصح بإيه ؟ ان لازم الفرد القائم
على تعديل السلوك يكون صبور ، و يكون مدرك ان تعديل السلوك غير السوى بيكون صعب على
الطفل قبل ما يكون صعب على القائم على تعديل السلوك .
ملحوظة☝
كل ما حصل تدخل مبكر ضد السلوك غير السوى
كل ما يقل مجهود و مدة تعديل السلوك غير السوى .
و الان قد انتهينا من عرض سلسلة ثمانية جيجا تعديل سلوك ، نتمنى لكم التوفيق و السداد
لينك السلسلة على صفحة الفيسبوك الخاصة بالمؤلف
لينك السلسلة على صفحة الفيسبوك الخاصة بالمؤلف
حلمك فى ابنك ، هتحققه ...
محتوي جميل..واتمني لك دوام التوفيق
ردحذفتسلملى يااارب
حذفمحتوي جميل..واتمني لك دوام التوفيق
ردحذفتسلمى يااارب
حذف