ازاي وامتى ابنك يشوف مشهد الذبح
سؤال مهم بما اننا داخلين على عيد الأضحىمبدئيًا كل سنة وانتم طيبين ويا رب يكون عيد سعيد عليكم وعلى أطفالكم❤
الأطفال بينقسموا لنوعين:
1⃣ النوع الأول:
بيحب يشوف مشهد ذبح الأضحية وبيكون سعيد ومش بيحصله مشكلات نفسية
وده معندناش مشكلة معاه
2⃣ النوع التاني:
لما بيشوف مشهد الذبح بيجيله نوبة من البكاء الشديد وبيخاف جدًا من منظر الدم ومن خروج الروح من الأضحية فـ ممكن يصاب بـ فوبيا الدم أو يمتنع تمامًا عن أكل اللحوم
وعلشان ابنك ميكونش من النوع التاني، اقرأ المقال للآخر💕
أولًا: تأهيل الأطفال لرؤية ذبح الأضحية:-
1⃣ اختيار الوقت المناسب لمشاهدة الذبح:يعني عند عمر 6 سنوات ابدأ في رحلة تأهيل ابني لتقبل الذبح وفهم الحكمة من الذبح، لأن لو قبل 6 سنوات هيكون فيه احتمال كبير جدًا ان الطفل يخزن صورة الذبح في عقله ويربطها بمعايير غير قيمية وأخلاقية وبتتخزن كـ نوع من أنواع العنف
2⃣ طيب أعمل إيه لو ابني عنده 6 سنوات؟ هنأهل الطفل نفسيًا في النقاط دي :
1⃣
• هحكيله قصة سيدنا ابراهيم وابنه سيدنا اسماعيل
• هفهمه بطريقة بسيطة الحكمة من الأضحية والذبح
• هفهمه إن الحيوان مخلوق لكده
• هفهمه اننا بنضحي علشان نوزع اللحمة على الفقراء فيفرحوا معانا بالعيد
2⃣ اخليه يشارك معايا فى التضحية بشكل تدريجي . طب ازاي؟
• عند عمر 6 سنوات هحكيله قصة سيدنا ابراهيم وهعرفه الحكمة من الأضحية
🔸لكن هنمنعه من رؤية مشهد ذبح الأضحية
• عند عمر 7 سنوات "قبل عيد الأضحى للسنة القادمة" هفكره بالقصة وبالحكمة من الذبح
🔸 هخليه يشارك معايا في توزيع اللحمة على الأقارب والفقراء علشان يدرك فرحتهم
• عند عمر من 8 إلى 9 سنوات هنخليه يشارك معانا في التوزيع وتقطيع لحمة الأضحية تحت رقابة طبعًا
• عند عمر 10 سنوات ممكن يشوف مشهد صغير للذبح
• بعد عمر 10 سنوات يقدر يشوف مشهد الذبح كامل
3⃣ هجيب الأضحية البيت متأخر شوية -قبل الذبح بمدة قليلة- بحيث الطفل ميشوفش الأضحية قدام عينه في البيت لمدة طويلة ويشوفها بتاكل وتشرب وبعد كده يشوفها بتندبح فـ الطفل يزعل عليها وممكن هنا يرفض إنه ياكل من لحمتها وممكن تتطور معاه المشكلة ويرفض أكل اللحوم تمامًا ويكون نباتي
ثانيًا: نصائح عامة:-
1⃣ متجبرش طفلك على رؤية مشهد ذبح الأضحية بسبب ظنك الخاطئ بإن مشاهدته للذبح هيقويه ويخليه راجل صلب لأن مش كل الأطفال نفسيًا مؤهلة إنها تتفرج على مشهد الذبح بالتالى انت كده بتعرضه لمشكلات نفسية ممكن تستمر معاه لما يكبر2⃣ لو طفلك نسبة ذكائه ضعيفة أو عنده توحد أو عنده مشكلات نفسية كتير أو بيجيله نوبات خوف وهلع أو عنده قلق دايمًا يبقى -من وجهة نظري- إنه يتمنع من رؤية مشهد الذبح
3⃣ يا ريت متعودش الطفل على عادات عديمة الفايدة مثال: انك تعوص إيدك دم و تخمس بيها على الحيطة😂
4⃣ العيدية : لو الطفل خد عدية من أقاربه والعيدية دى كانت كبيرة نسبة كبيرة من الأمهات بتاخد العيدية من الطفل وبتقوله هحوشهالك معايا ولما الطفل يطلبها تاني تقوله صرفتها ده غلط كبير جدًا وانتي كده بتعوديه على الخداع والنصب مع اني عارف إنه بيكون بـ حسن نية منك
أو انك تاخدي العيدية منه بالقوة وده بردو غلط كبير جدًا لأنك كدة بتعلميه السرقة بالإكراه 😂
ملحوظة ⚡
1⃣ الأعمار اللي أنا قولتها دي بتمثل الحد الأدنى يعني ممكن ابدأ في تأهيل الطفل بعد عمر 6 سنوات مش قبل عمر 6 سنوات2⃣ الأعمار دي متوافقة مع الطفل السوي الطبيعي جدًا والفروق الفردية تخليني أقولك لو لاحظتي إن الطفل معندوش استعداد للتأهيل لرؤية الذبح يبقى متأهليش دلوقتي واستنى السنة اللي جاية أو اللي بعدها
3⃣ لو ابنك عنده 10 سنوات أو حتى 15 سنة ولسه مش عاوز يشوف مشهد الذبح ده عادى جدًا جدًا متقلقيش "سيبيه على حريته"
لمعرفة كيفية تعديل سلوك العدوانية و العنف عند الأطفال اضغط هنا
لمعرفة كيف تحمى ابنك من اكتساب سلوك الغيرة اضغط هنا
لمعرفة الطريقة الصحيحة للعقاب لتجنب الاضطرابات النفسية الناتجة اضغط هنا
لمعرفة الطريقة الصحيحة للتعزيز و كيف لا يتحول المعزز لرشوة اضغط هنا
لمشاهدة فيديو عن كيفية التعزيز و العقاب بطريقة فعالة لتعديل السلوك و التربية اضغط هنا
لمتابعة قناة اليوتيوب الخاصة بالموقع اضغط هنا قناة ابنك يهمنا
تعليقات: 0
إرسال تعليق