نظام الدمج / دمج ذوى الاحتياجات الخاصة فى مدارس التعليم العام
يعنى إيه دمج ؟
الدمج عبارة عن إدماج الطلاب من ذوى الاحتياجات الخاصة فى المدارس العادية ، بشرط ان يكون الطلاب ذوى الاحتياجات الخاصة المدمجين قابلين للتعلم و مستحقين لبرامج التربية الخاصة .أنواع الدمج ؟
أهم أنواع الدمج و أكثرهم انتشارا فى المدارس :1. الدمج الكلى فى المدارس العادية : يعنى الطالب من ذوى الإحتياجات الخاصة موجود داخل الفصل مع الطلاب العاديين و بيتعلم معاهم . و كمان بيكون ليه جلسات أو حصص فى غرفة المصادر .
☆ غرفة المصادر : دى عبارة عن فصل ( حجرة ) فى المدرسة موجود فيها الأدوات و الوسائل التعليمية اللى بنستخدمها لتدريس ذوى الاحتياجات الخاصة ، و غرفة المصادر بيكون موجود فيها معلم التربية الخاصة اللى بدورة بيتابع الطلاب ذوى الاحتياجات الخاصة داخل المدرسة .
2. الدمج الجزئى فى المدارس العادية : و هنا بقا الطلاب ذوى الاحتياجات الخاصة موجودين فى فصل خاص بيهم فى المدرسة العادية ، يعنى مش موجودين فى نفس الفصل مع الطلاب العاديين .
من هم الطلاب اللذين يستحقون الدمج ؟
طيب تعالوا نكون متفقين إنى هقول دلوقتى فئات الطلاب اللى الدمج بيكون قابل للنجاح معاهم ، يعنى أنا مش هتكلم عن الفئات المستحقة للدمج حسب القوانين و اللوائح . يعنى هتكلم عن الفئات اللى أنا شايف انها هتنجح و هتستفيد من الدمج ( بغض النظر عن عيوبه و أخطاء تطبيقه اللى هنتكلم عن حلولها فى المقالات القادمة )1. الطلاب ضعاف البصر (إعاقة بصرية بسيطة و متوسطة) :
و دول الطلاب اللى من خلال المعينات البصرية ( النظارات الطبية ) بيقدروا يشوفوا السبورة من خلال الجلوس فى المقاعد الأولى داخل الفصل ، و كمان المعلم بيساعدهم على متابعة و فهم الشرح من خلال وسائل تعليمية سمعية .2. الطلاب ضعاف السمع (إعاقة سمعية بسيطة و متوسطة) :
و دول الطلاب اللى من خلال المعينات السمعية ( السماعات الطبية ) و مكبرات الصوت بيقدروا يسمعوا داخل الفصل ، و كمان المعلم بيساعدهم على متابعة و فهم الشرح من خلال وسائل تعليمية بصرية .3. الطلاب ذوى صعوبات التعلم :
بكل أنواعها أنصح بدمجهم فى المدارس العادية .4. الطلاب المعاقين حركيا :
الشرط هنا انهم يقدروا يساعدوا نفسهم من خلال الأدوات المختلفة زى الكراسى المتحركة .5. الطلاب المتفوقين عقليا :
6. الطلاب المتأخرين عقليا ( نسبة ذكاء أعلى من 50 ) :
و طبعا نسبة الذكاء تعرفوها من خلال تطبيق اختبار استانفورد بينيه عند أخصائى كويس ، يعنى مش من الجامعة او التأمين لانهم بيطلعوا نسب ذكاء غلط فى معظم الأحيان .7. الطلاب اللى عندهم توحد
تعملى ايه كأم علشان تضمنى ان ابنك هيستفيد من المدرسة العادية أقصى استفادة ؟
بصى يا ماما لازم الأول نكون متفقين ان فيه فروق فردية بين الأطفال ، يعنى ابن حضرتك مش زى باقى الأطفال المدمجين . فهقولك دلوقتى مجموعة نقاط نركز فيهم جدا علشان نعرف هنعمل إيه للحصول على اكبر استفادة لابنى من المدرسة العادية .( 1 ) سبب المشكلة :
و المشكلة اللى نقصدها هنا '' الصعوبة فى التعليم '' لازم تعرفى سبب صعوبة التعليم عند ابنك ، يعنى إيه ؟● يعنى هل ابنك عنده صعوبة فى التعليم بسبب جانب نمائى ( انتباه _ ادراك _ تذكر _ تفكير _ حل مشكلات ) .
● ولا ابنك سبب مشكلته نسبه ذكاء قليلة .
● أو ابنك سبب صعوبة التعليم ان عنده توحد مثلا .
( 2 ) متابعة معلم تربية خاصة ( أخصائى ) :
و دور الأخصائى أو معلم التربية الخاصة انه هيساعدك فى :1. تحديد سبب صعوبه التعليم عند ابنك .
2. تحديد الخدمات اللى ابنك محتاجها علشان مستواه يتحسن ( هل محتاج جلسات تنمية مهارات _ هل محتاج زيادة دافعية مش أكتر _ ... )
3. تطوير الجانب الأكاديمى لابنك بجانب دور المدرسة . ( الأخصائى هنا بيكون بمثابة الدرس الخارجى عند الطالب العادى )
طيب انا هلاقى الأخصائى او معلم التربية الخاصة فين ؟
هتلاقيه فى مراكز التخاطب أو مراكز تأهيل ذوى الاحتياجات الخاصة .
( 3 ) كيفية التدخل من الأخصائى ( معلم تربية خاصة ) :
و هنا فيه طريقتين للتدخل مهمين جدا :1. طريقة طولية :
يعنى بحل سبب المشكلة الأول و بعد كدة بدخل على الجانب الأكاديمى . يعنى مثلا لو السبب نمائى ، هعمل للطفل جلسات تنمية مهارات انتباه او ادراك او .... و لما المهارات دى تتطور عنده هدخل على الأكاديمى .
2. طريقة عرضية :
يعنى بشتغل على حل سبب المشكلة و الجانب الأكاديمى فى نفس الوقت . يعنى مثلا هشتغل معاه 4 جلسات أسبوعيا ( جلستين مهارات + جلستين أكاديمى )
☆ ملحوظة مهمة جدااااا :
الأخصائى هو اللى بيحدد الطريقة المناسبة حسب حالة و استعداد الطفل .
( 4 ) متابعتك كأم لابنك :
الإهتمام مبينطلبش يا ماما 😂 ، فلازم انتى كأم تتابعى كل حاجة جديدة ابنك بياخدها فى الجلسة و تراجعى على القديم .( 5 ) احترام عامل الوقت :
احترمى عامل الوقت تبع استعداد ابنك ، متستعجليش النتيجة يا ماما و خلى بالك ان عدم تقبلك التطور ( القليل من وجهة نظرك ) بتاع كل جلسة بيقلل من ثقة ابنك فى نفسه .( 6 ) حلقة الوصل :
ولى الأمر هو حلقة الوصل بين الأخصائى اللى فى المركز و المدرس فى المدرسة ، أيوا بالظبط كدة 😃ماما هتاخد من الأخصائى البرنامج بتاع ابنها و توديه لمدرس المدرسة علشان يكون المدرسة معاونة للأخصائى أو العكس .
يعنى ممكن تجيبى برنامج من مدرس المدرسة و توديه للأخصائى أو العكس ، المهم ان ابنك يكون ماشى على برنامج واحد علشان نمنع التشتت .
طيب لو البرنامج بتاع المدرسة مش متفق مع برنامج الأخصائى اعمل إيه ؟
هاتى أرقام تليفونات مدرسين المدرسة اللى بيدرسوا لابنك و اديها للأخصائى و هما هيتواصلوا لتوحيد البرنامج .
النقاط دى هتساعدك فى الوصول لأقصى استفادة للطفل من الدمج فى المدارس العادية .
( 1 ) لازم تحدد سبب صعوبات التعليم عند الطالب و تعمل تشخيص للطالب طبعا ( تقييم كل الجوانب عند الطالب )( 2 ) بعد ما تحدد السبب تعمل برنامج للطالب هدفه علاج السبب و الإرتقاء بالجانب الأكاديمى للطالب .
( 3 ) لازم يكون فيه وسيلة اتصال بينك و بين المدرسين اللى بيدرسوا للطالب فى المدرسة ، علشان تتواصلوا مع بعض و تتفقوا على البرنامج اللى هتشتغلوا بيه مع الطالب ، اتفقنا البوست اللى فات ان البرنامج بيكون موحد علشان نمنع تشتت الطالب .
( 4 ) الدافعية الدافعية الدافعية لو مش موجود دافعية للتعليم عند الطالب يبقى مجهودك شبة ضااايع للأسف .
إزاى نزود الدافعية عند الطالب ؟
( أ ) عن طريق استراتيجيات تعديل السلوك :تعزيز و تعاقد سلوكى و ...
( ب ) نبحث علاقة الطالب بزملاؤه فى الفصل :
فى معظم الأوقات بتلاقى العلاقة بين طلاب الفصل و طالب الدمج علاقة سيئة جدا ، بيرفضوا التعامل معاه و ....
فحضرتك عن طريق التواصل مع المدرسين اللى بيدرسوا للطالب فى المدرسة هتحل المشكلة دى .
طبعا مش هتكلم على علاقة مدرس الفصل بطالب الدمج لأن دى أو حاجة ليك كأخصائى هتحاول تبحث فيها و تعدلها لو كانت سيئة .
تعليقات: 0
إرسال تعليق