-->
≡

التلعثم - ابنك يهمنا

التلعثم - ابنك يهمنا

التلعثم

التلعثم بإختصار شديد جدا " اضطراب فى انسيابية الكلام " يعنى الطفل لما بيتكلم مش بيعرف يقول الكلام ورا بعضه بسهوله .

و علشان نتكلم عن التلعثم يبقى احنا بنتكلم عن حاجة بتحصل بشكل لا إرادى ( عفوى و غير مقصود ) و الحاجة دى مقسومة ل ٤ مظاهر قد تكون موجودة كلها عند المتلعثم أو عدد منها بس هو اللى موجود :

١. المظاهر السلوكية

المتلعثم بيكرر أول صوت أو مقطع من الكلمة ، بيطول فى صوت ف الكلمة ، بيقف ف أول الكلمة و بيحس بثقل ف بدايه النطق ( احتباس ) فبيطلع الصوت بشكل انفجارى شويه .

٢. المظاهر الجسمية

المتلعثم بيحصله تشنجات لا إرادية فى الرقبه أو العين أو الفم و أعضاء النطق أو اليدين و القدمين

٣. المظاهر الفيسيولوجية

المتلعثم وقت الكلام ممكن يزيد معدل ضربات القلب ، بيحصله اضطرابات فى تنظيم التنفس ، بيزيد ضغط الدم

٤. المظاهر الانفعالية

المتلعثم قبل أو أثناء أو بعد الكلام بينتابه شعور بالقلق و التوتر أو نقص تقدير الذات أو الانسحاب أو العدوانية او الشعور بالذنب أحيانا .

نقطة بسيطة بقا ف التلعثم 

التلعثم اللى بيجى للأطفال فى عمر سنتين و ٣ سنين و قد يستمر لعمر ٥ سنوات ، دة مش تلعثم مرضى لكن دة تلعثم طبيعى بيختفى لوحده و ناتج عن النمو اللغوى . و الأخصائيين بيسموه " تلعثم النمو "
أما بقا لو التلعثم استمر مع الطفل لبعد ٥ سنوات ، أو جاله تلعثم بعد سن ٥ سنوات يبقى لازم تروحى تستشيرى أخصائى أو دكتور .

طيب لو ابنك عنده " تلعثم النمو " تعملى إيه؟! يعنى لو ابنك عنده من ( ٢: ٥ ) سنوات و بيتلعثم تعملى إيه ؟!

١. حاولى بقدر الإمكان متجذبيش انتباه الطفل و متخليهوش يفهم ان كلامه مش طبيعى .
٢. نحاول بقدر الامكان نخلى كلامنا مش سريع قدام الطفل ، و بالتالى الطفل يتعود يتكلم ببطئ فنقلل من احتمالية التلعثم فى الكلام .
٣. بلاش ثم بلاش ثم بلاش تضربى ابنك أو تعاقبيه أو تزعقيله عشان يتكلم صح ، قولنا فوق ان التلعثم ف مرحلة من ٢ : ٥ سنوات تطورى و طبيعى و كمان لا إرادى ، يعنى الطفل مش قاصد يعمل كدة .
٤. لما ابنك يتكلم تقفى تسمعيه لحد ما يخلص كلامه للآخر ، و ابتسمى ف وشه و هو بيتكلم عشان يعرف انك فاهمه كلامه . خليكى بشوشة يا ماما 
٥. لو حد فى العيلة بيتريق على ابنك و هو بيتلعثم ف الكلام ، اضربيه فى وشه 
٦. زودى ثقة الطفل بنفسه و لما يعمل حاجة صح تبتسمى و تحضنيه و تقوليله شااااطييير 
٧. بلاش تسألى الطفل كتير لأن موقف الإجابه على الأسئلة بيزود من احتمالية التلعثم و خاصة لو بتسأليه عن حاجة غلط عملها 
٨. إحنا مش فى حفلة، بلاش تقلدى طريقة كلام الطفل وهو بيتلعثم .

كاتب هذا المقال / حسن أبوطالب
              أخصائى التخاطب و التربية الخاصة 

للإشتراك فى قناة اليوتيوب الخاصة بالمدونة ، اضغط هنا

مقالات قد تهمك :

1. علاج نوبات الغضب و البكاء و العصبية عند الأطفال ، اضغط هنا
2. تدريب الأطفال على الانتظار بدون بكاء ، اضغط هنا
3. كيفية تطوير الدماغ لتحسين العمليات العقلية عند الأطفال ، اضغط هنا
4. الطرق الفعالة لتقوية الذاكرة و الاحتفاظ بالمعلومات ، اضغط هنا
ابنك يهمنا
كاتب المقالة
كاتب ومحرر اخبار اعمل في موقع ابنك يهمنا .

جديد قسم : من أجل ابنك

تعليقات: 0

إرسال تعليق